انت مع الرئيس أو ضدو، يفترض ان طريقة اعتقال سيف مخلوف تثير على الأقل استنكارك. أنت مع الرئيس أو ضدو، يفترض محاكمة ياسين العياري امام القضاء العسكري يثير إدانتك. أنت مع الرئيس أو ضدو، يفترض تنزعج من استعمال السلطة الحاكمة، قبل 25 وبعد 25، للأمن والقضاء لقمع أو تصفية خصومها. انت مع الرئيس او ضدو، يفترض يكون عندك احترام للحريات: الحريات ما جابهاش قيس سعيد، ولا جابها راشد الغنوشي. هذاكة علاش ما ينجموش يمنعوا ممارستها، ولا التمتع بيها. منع الناس من السفر بسبب المهنة ما ينجم يكون إلا اعتداء عليهم، وعلى القانون، وعلى الحريات. هذا ما عندو حتى تسمية أخرى غير الإستبداد. الدولة ما تنتقمش، الدولة تطبق القانون فقط: الدولة إلي ما طبقتش القانون على سيف مخلوف في السابق جُبنا، ما نقدرش نحترمها اليوم وقت تقوم بتطبيقه بحماس لأن سيف مخلوف في موقع ضعف. سيف مخلوف هدد الناس بالقمع والسجن إذا يتظاهروا في السابق. هذا درس ليه اليوم. لكن الدرس الكبير للآخرين أنكم إذا مادافعتوش اليوم على خصوم الرئيس، فأنتم لستم أفضل منهم، وما ينجمش ننتظر منكم حتى شيء إيجابي. الدرس الكبير إلي نعيشو فيه بطريقة دورية توة عشرة سنين، هو أنك وقت تدافع عن خصومك، فإنك في النهاية تستبق بالدفاع على نفسك. غدوة يجي حد آخر، ويستهدفكم. علاش تستناو في غدوة وقت انتوما تنجموا تبداو الدفاع على أنفسكم من توة؟!